職場大忌第一條：得罪秘書。

公司架構大，個個部門主管都有自己嘅秘書，每個秘書燕瘦環肥，外形唔同，唯一類近嘅，就係脾氣同殺氣。 

好衰唔衰，打工仔一年365日，總有得罪秘書嘅時候，而好多時都未必係自己衰得晒，但就要認低威。 

以下是朋友同事親身經歷，就好似mark老闆時間咁，明明同秘書mark咗佢星期一十二點在旺角有個午宴，同秘書reconfirm時佢竟然問唔係12點半咩？仲話自己已經幫老闆插咗個會在11點半，「你預老闆會遲喎！」 

同事忍唔住隔住講：「我send過email mark日子，講明12點開始，依家咁我好難做，無理由要我班stakeholder等，我亦冇可能呢一刻先改人時間。」 

秘書聽到有人覺得係自己責任，即刻嬲咗，「你哋全部人send啲email來都寫得唔清唔楚，我點知你個12點係指開席時間，你又冇講reception幾點！」 

冇辦法，見到秘書嬲咗，同事都知衰，補返句：「我都知我哋衰，你一日接咁多appointment，係好難做。下次我會寫好啲……」 

但似乎已經返唔到轉頭，秘書由當日起冇再接佢電話，所有嘢白紙黑字但嚴重delay先回覆……搞到同事永遠都擔驚受怕……但同時又咬秘書唔入，因為佢唔係失咗蹤，係真係有回覆，只係唔再做順水人情。 

所以話，得罪秘書，不如及早遞信。