30歲女人＝中女、無市場？4位男生對30歲女人的看法

「29+1」近年成為了女人30歲的代名詞，仿佛踏入3字頭的一瞬間，自己就即刻成為中女、敗犬、跌價十倍云云。究竟，男生又係咪用同樣負面的角度睇踏入三十代的女生呢？筆者同幾位男性朋友傾過，每人都得出一個答案。

淡定Joe（28歲）：29同29+1有分別咩？

其實香港女仔普遍皮膚都唔差，加埋成日將咩「年齡係女人的最大秘密」掛喺口邊，通常港女的年齡都會被低估(認真Mode)。29歲同30歲都無分別。

務實Eric（30歲）：佢一開波就想談婚論嫁

以我前女友為例，就嚟30歲都未有著落，真係開始會緊張自己幸福。諗法都真係會目標為本少少：有目標埋身，都會想盡快做曬「人口普查」，例如搵幾多做咩職業同屋企關係有冇車、有無樓Bla bla bla…

佢俾到我一種『無時間啦，出絕招啦！』的感覺。同個男仔開始咗，同後生嗰陣想左顧右盼下的思想好唔同，女人拍拖只為結婚，而且會好主動咁plan 結婚，或者盡量Keep到自己有個狀態等人求婚，即刻應承。

穩重David（42歲）：三十代的女生有種沉著、好得人鍾意

唔好淨係講男仔，女人踏入30歲之後，可能真係人生歷練豐富了，成個人會沉著好多，懂人情世故、識得體諒男友、照顧返男仔，我自己都幾有好感。

(對於朋友俾出呢個標準答案，筆者笑足半分鐘無言以對)

笑咩？係啊，踏入三十代的女朋友已經唔會將另一半當成自己全世界，所以同時間佢亦都唔會因為無謂野大吵大鬧，會退後一步諗清楚，再同你拆掂佢。大家都係想搵返一個Soul Mate過埋下半世，係咪先？

花心Keith（36歲）：30歲女人更識打扮

我比較鍾意會打扮的女仔。比較起20出頭青春無敵，30歲的女仔普遍會變得比以前姿整；會願意花費多少少去裝身，至少可能搵錢搵多咗，買少咗淘寶衫，變得有taste。